ياسر فانوس - لغة الفوانيس
لــغة الفوانيس
حبيبتي قالت لي تعال نتونس
ونسه طاعمه وكلام دقااااق
بي شارع الحله التحت
ونيمه مسبولة فى زقاق
بي فله بتنقط عبير
تستوحي من ابنوسه لون
تقترح للوردة ساق
انا دايرة الاقيك واحكي ليك
عن بلد بالوجعه شاق
عن رئيس كل في جوله
ويستبيح ضيق الخناق
وعن جرحه بتاور محل
كلما ذاد النفاق
وعن صفوف بالحوجه تقنت
وعن ضمير من نومو فاق
مجروحه بيبان القلوب
مجبورة تقبل بالفراق ،،
رديت عليها ~~
الله إسالك !!!!
هسي دي ونسه طاعمه
وكلام دقاااق ؟؟
مالك علي والغربه
سلبتني الرفاق
ازمات يمدن في اللسان
وانا حارقاني نيران الفراق
كل الدروب صعبت على
وعارفه شافع الرجعه عاق
خليني في وجعي العلي
وجروحي واسعات النطاق،،
ردت على ~~
ياااخ تعال نتلاقي
والخاطر يطيب
المرة دي
ونسات دقاق وكلام رطيب
نتلاقي في اللون البنفسج
حزمة شعاع ووضوح عجيب
اتمني نتلاقي ونكون
وافتحلك الوجدان رحيب
رديت عليها ~~
عارفك حنينه
وفايحه جوه القلب طيب
حاتة صفق الفرقه يومي
وهابه في البال همبريب
داهنه لوحات بالموده
وينعكس لون الحليب
بوعدك جاييك باكر
ويبقي راس الفرقه شيب
ردت علي ~~
اشتهيتك نمشي (جاكسون)
عادي نتقمح مقاعد
هسي من الان فصاعد
نعلن الحال المريب
مشهد مكرر كل يوم
مادي إيد الوجعه ساعد
راجي للفيها النصيب
وانا تايهه في نص زحمة حاصله
وكايسه للدرب البجيب
مقفوله بيبان الهوايس
حالة تغنيك عن سؤال
جرحه اوسع من تطيب
وانا فاردة حضن اللقياء يومي
وراجيه في يوم تستجيب
رديت عليها ~~
ياسمحريه
انا شوقي ذي شوقك صبيب
كلما ما امشيك بدونك
دي الدروب تختي وتصيب
وانا كلما ظرفك يخونك
تلقيني في الحرجات طبيب
عافي ليك زمني البدونك
نتلاقي في الجرف الخصيب
تعليقات
إرسال تعليق