مرام علي

 

بهديكا وِدادي ..

حِن غِنوة أصيلة من الرادي ..

شوقْ الحِبّان

ود الجيران : 

عُيون بتتاوق من حِيطة 

وأمَل ريّان :

تعال يا زولْ بي غادي ..

بهديكا مَحنّة 

و حوشْ مرشوش 

فيو بتْ سمحة

جنب شجرة حِنّة ..

شاردة تطرز منديل

بي حيل الوُد البلحيل :

" يا طير الجنّة

رِكْ في الحِنّة ..

قول للبنريدُمْ : طوّلنا ! "

و بهديك لمحة ..

عصفور بيغالط في قمحة ..

بهديك إيناسك 

صلوات حبوبة تمطّر إحساسك ..

بهديك كم صورة 

وشُبّاك خَشبي 

فِبِيت مهجور 

وما رحَلت منّو العصفورة ..

بهديك طلّة 

وفرحة شافع

كان محبوس 

ماشْ يِلعَب دافوري مع الشُّلة ..

بهديك الكُل 

ونيمة نبيلة 

فِبِيت عامر 

رغم الأيام 

ما شاخ الضّل ..

بهديك الضي 

كوراك شفع

كورة شراب 

و زُقاق في الحي ..

نوبةْ مُدّاح

وسِبح صُلّاح

يا حي يا حيّ ..

بهديك نظرة 

وضحكة عينيّ

لمّا أشوف زولة تورّق في خُدْرا ..

أهديك النور

أهديك للنور :

قلبي المأسور ..

كَوْنَك حَضْرة !

بهديك : عايِن

عصير شربات

في حفلة بسيطة 

كان نورا رتاين ..

بهديك ريحة منديل : فاين ..

بهديك لَيّا 

مشوار حبّان 

ماشين جُوّاي 

مُغرب تابعاهم قمرية ..

بهديك السُّمرة

وكوراك صحبان

لاعبين كشتينة 

فِ ضَي قمرة ..

بهديك كل حاجة 

وجواب مكتوب 

بي نور فانوس 

فيهو الأشجان وجّاجة ..